يجسد الشاعر نواف محمد الصخابرة مشاعر الأبوة الحانية في قصيدته في ابنه محمد شفاه الله:
سبحان من بأمره تصاريف الأقدار
رب البشر ما خاب من كان يرجيه
عالم بما نعمله في سر واجهار
منشي السحاب وساير الكون يدعيه
أطلبه يشفي واحدٍ يسكن الدار
نور العيون اللي بقلبي مبانيه
طفلٍ صغير وله محبه ومقدار
باول حياته ما درى وش جرى فيه
يشكي ولا يدري عن الموقف الحار
يبكي ودمعه أثّر بقلب مغليه
وانا من الموقف جرى الدمع مدرار
والله عليم الحال ما هوب خافيه
أشيل حملٍ فوق حملي وصبّار
وأنا بما فيني من الحمل أداريه
أشكي على المعبود في كل ما صار
وادعيه يشفي من عيوني تراعيه
ويمد في عمره سنواتٍ اكثار
ويحميه من جور الزمان وبلاويه
لا شك أنا راضي ولا نيب محتار
دامي موكلها على ربٍ أرجيه
الشاعر/ نواف بن محمد الصخابرة
