يالله عفوك يوم تصفية الحساب

يوم الحصاد لما زرعنا في السنين

يوم الحشر قرّب ولا معنا زهاب

اليوم في الدنيا وبكرة راحلين

نجني ذنوب ونرتجي عفو وثواب

وعلى نصر ربي لنا مستعجلين

تدرون ليه آمالنا كنها سراب

تدرون ليه النصر سيف الأولين

الأولين أعمالهم وفق الكتاب

قاموا عليه وباعوا الدنيا بدين

وحنا غفلنا بين ما لذّ وطاب

والنصر سيفٍ ما يسله غافلين

نصبح على شوف انتهاكات وخراب

ونمسي على دمع وتنهّات وونين

بصدورنا شيٍّ تذوب اله الهضاب

وأفعالنا والواقع.. رياح.. وطحين

وعلى العيون من الفتن مثل الضباب

ماعاد ندري من يسار ومن يمين

ما للضعيف الا الدعا لو ما يجاب

ما غيره الا الشوف مكتوف اليدين

يالله زلزل تحت الأعداء التراب

والطف بنا واحقن دماء المسلمين

ندعوك يا قادر على جعل السحاب

جيشٍ لنصرة قلةٍ مستضعفين

أغرقهم بنوع من أنواع العقاب

غرق الغلام اللي يحسب انه فطين

لوما عصى نوح نجا به في رحاب

سفينته وأمضى معه في العمر حين

لكنه اختار الخسارة والذهاب

اصنع بهم صنعتك به وانت المتين

والا اخذهم يا مجري سود الحقاب

أخذ العجوز اللي بقت في الغابرين

ذوّقهم اللهم أنواع العذاب

اللي عثوا في أرضك امن المفسدين

وألطف بمن لبسوا من التقوى ثياب

عبادك المستهدفين المتقين

تكالبت عليهم أنياب الذئاب

ولا غير عونك يا معين الصابرين

من بينهم شيبة يعجزون الشباب

من وقفته من طولها في الركعتين

ومن بينهم بنت تونّ بلا حجاب

أحجابها لفوا به الجرح المكين

وطفل عن عيون أمه الثنتين غاب

تبكيه عين وتلتفت لاخيه عين

من هول ما يجري لهم شاب الغراب

يا وسع حلمك وانت ما فوقك مدين

داعيك وانت ادرى بحال أهل المصاب

وأمد كفي لك يا أكرم الأكرمين

محمد بن فطيس