يا طير مبطي وروحك تعشق الحومه

ودّك تطير وتعلاّ راس مشرافي

ما دام ودّك تعلاّ هاك معلومه

ما يصعد اللي صعوده فوق الاكتافي

اطلق جناحك وحلّق وابعد الهومه

ما دام كفك شطير ومعدنك صافي

كم لك ونفسك من الهدّات محرومه

باسباب ظلم الزمان وجفوت الجافي

معاك ثوب الليالي قصرت كمومه

لكن يمينك وفيّه والفعل وافي

فضاك واسع واشوفه كثرت نجومه

ولا كل نجمٍ بهذا الكون ينشافي

ما كل غيمٍ تفزّ القاع بقدومه

لا عاد ما اروى قدومه سبعٍ عجافي

يقطف من الروض ريحانه ويشمومه

لاشك باقي نباته شاله السافي

الناس تعشق جزيل الحرف وتسومه

اتعب لحرفك وتلقى منها الانصافي

لا جيت بحر المعاني ناوي تعومه

تعوّد انك تخيّر جزل الاوصافي

شعرٍ يعيش ويموت وما اكتمل يومه

هذاك ما ارضى تشبّه فيه ياقافي

يا قاف الاشعار خل الوقت وهمومه

روس المشاريف ميقافك وميقافي

الشاعر - صالح محمد