في حياتي كلها ما بلغ سمعي كلام

أحلى من كلمة (من العايدين) بفمها

كان هذا البيت مطلع كتبته قبل عام

بيت واحد من قصيدة عجزت اتمها

وامس عاد الوقت نفسه وفي نفس الزحام

شفتها بعيون ناس تلفت يمها

جت تضم الورد بكفوفها شمس الظلام

وجيت لكفوف تضم الورود اضمها

جادلٍ من عطرها ينتشي ورد الخزام

هي تشم الورد والا الورود تشمها

عيد الأضحى صار بقدومها عيد الغرام

والغرام غلى عياد العمر واهمها

القصايد عيدن بك عقب طول الصيام

عن وصوف الغير.. ماغير وصفك همها

يا بعد قصايد الشاعر «رشيد الدهام

ويا بعد من هو مدحها ومن هو ذمها

صوتك اللي لاهمس لي بمردود السلام

أشعر أن أرجاء الأرض السلام يعمها

تذكرون المطلع اللي كتبته قبل عام

صار قفلة هالقصيدة قبل ما أتمها

في حياتي كلها ما بلغ سمعي كلام

أحلى من كلمة «من العايدين» بفمها