وين اودي تهاني فرحة العيد
من يبادلني الفرحه تهاني
جيت ادور سلام ولا لقيت ايد
لابسٍ ثوب عيد ولا كساني
اسمع اصوات خلق الله زغاريد
والامل منطوي بين المحاني
في رجا غيبةٍ طالت سراميد
ساقت الخوف بدروب الأماني
من فراق الحبيب تحزن البيد
ومن غياب الحبيب احزن واعاني
يذبل الورد من جور المواعيد
والدقايق تمل من الثواني
سافر الشوق بغيابه تراديد
لا وعدني بوصل ولا عطاني
وانكف الحبل من عذب المواريد
مالعبت الهجيني للسواني
قالوا بعيد قلت أي والله بعيد
زين كانه بعيد ولا نساني
