الغلا اللي قيد الخافق وشد قيوده

وامتلك فكري وتفكيري ونطق لساني

للوليف اللي رسومه بالحشا موجوده

بين حيطان الضماير ثبت البنياني

هجر اللي كان قبله واستحل حدوده

وحل في دار خليه من البشر وحداني

ذاك حب صح بانت صحته من جوده

ما خذن الاول على لارقام ما هو ثاني

ليت جدي يا جميله ينتمي لجدوده

لكن إنه لا ولد جدي والا عماني

والعوايد والسلوم بوقتنا مشدوده

نكسر الخاطر ونرضي واحد زعلاني

أشهد ان له بالمحاني قصة مشهوده

أحتكرها القلب من عامين بالشرياني

قصة فاح الغلا منها بدهن العوده

وجوري الطايف نبت فيها مع الريحاني

أرجعت ريضان قلبي واعشبت بوجوده

وهجرت بغياب زوله روضة البستاني

وكل غصن من زهور العشب يهجر عوده

دام ما جاه المطر من صادق الامزاني

يا سحايب نجد ولاّ يا نسيم السوده

خبريني عن ربيع ما مطر باوطاني

خلت براقه وشاق السمع حس رعوده

بارقه في عرض مزنه يجذب البدواني

واشتعفت وصرت من دار المطر مطروده

ما حصل لي كن خيال البرق والحرماني

ول يا حظ تردى ما وصل مقصوده

كيف أعالج حظي اللي مبطي مرضاني

وكيف احل عقود حبل دايم معقوده

وكيف اعلم خافقي للصد والنسياني

وكيف أعوض حضي اللي خاسر مجهوده

كل ما يشري يبي الارباح جاخسراني

مخاوية الذيب