من يجيب العلم عن مظنون عيني

من يخبرني ويكسب بي حساني

راحت أخباره وانا قلبي حزيني

والله ان الهم بفراقه طواني

واعذابي منه ضيعت اليقيني

واشقا عيني على شيٍّ دهاني

ان غفيت بساري افكاري تجيني

لحظةٍ تطغى على كل المعاني

يحتضن ملفاك رجواي وحنيني

ويبتهل لك بالرضا نبض المحاني

يورق الحرمان مشكاة وأنيني

والفرح في حضرته عمره ثواني

ما يبي تمشي بغباته سفيني

من ردى حظ بلاني به زماني

ما خبرت الوقت وافاني بزيني

كيف اشاوف والغرابيل تحداني

حز مظنوني بهجرانه وتيني

وانتصر عَذَّالنا يومه جفاني

الله اكبر ما تغيَّر بي سنيني

كنها تنصب محاذير الغواني

وين ما اطرقها تعاندني بشيني

ما ردعها ضيم قلبي والهواني

يوم جيت اللي هقيته يحتويني

يختصر فيني مشاوير الأماني

وامنحه عذب الغلا كانه يبيني

حيث غيره بالعذارى ما عناني

سلمه قلبي ظنونه باليميني

وباليسار يزيح له عالي المكاني

قلبي اللي ما يحوش الا الثميني

ما يطيح الا على الحيل السماني

من يلومه بالهوى يا عاذليني

ما يشوف ولا سمع له بالاذاني

من عرض له منوته ترف اليديني

والروابع في سما حسنه تعاني

يشهد الله والحلا عندك رهيني

انك اللي مالكٍ قلبي وشاني

يا بعد كل العذارى سامحيني

والخطا مني كبر ضلع ذهلاني

صالح بن إبراهيم العوض