يا الله برزق وانت فتّاح بابه

يا خالق قوت البدو والفلاليح

النوم ساس اللوم بان الردا به

وعين تبي الطولات نومه شلافيح

واللي يدور الفود يتعب ركابه

والرزق باطراف الخطا يا اهل الفيح

الذيب ما يرقد ورزقه نهابه

يبحث عن الغرات حول المصاليح

يحمد مصابيح السرى من سرابه

بالليل الاظلم والنعايم مدابيح

مريبد العدواني

ترى الصخا والبر من شارة الدين

وبشاشة في وجه من جاك عاني

اجهد لهم لاجوا على الهجن ناصين

قلط لهم يا بدر حيل وصياني

للمرتحل حق على اللي مقيمين

باكرامهم بالك تصير متواني

حتى الى ركبوا على الهجين مقفين

كل يقول معزبي مرحباني

عبدالعزيز بن عبدالله العسكر

يا رجلي اللي ما توذي على الجار

ما هي على جاري كثير غثاها

ولاني على غرة قصيري بغدار

ولا ادور الغرات عند قصراها

عايض الميموني