لبا عيون الغلا.. لبا هماليلك
يا غيمة جات تحكي عن عواطفها
تجلا العطش عنك يا قلبي وتحكي لك
أسرار من دونها ما كنت تعزفها
يوم إنها ناصفتك الحزن في ليلك
وإنت بخيالك حروف الحب تعرفها
تبني أمانيك وتردد مواويلك
في وردة تحسب إن الوقت قاطفها
ما تدري إن الحبيب اللي دفع حيلك
تكسب رهان القصايد جاء يلاطفها
قريب منك التفت واشعل مواصيلك
ما هي خيالات من ذهنك تولفها
دع ما مضى لك وهات اليوم ترتيلك
بأحلى مواعيد وأحلى حب ينصفها
هاك العيون اللي أغلتك وتغني لك
لبا عيون الغلا.. لبا عواطفها
