أحمد الله وأشكره في البداية والختام
وأطلب المولى يوفق عسى بالأمر خير
الشكر لله منشي ثقيلات الغمام
بأمر ربي لا نشت بالمسا والا عصير
وأمطرت والجو صافي مطرها ياسلام
كل وادي من غزير المطر يهدر هدير
عد من رحب وهلا ومن صلا وصام
نحمد الوالي على الرزق والخير الكثير
والثنا والحمد للي عيونه ما تنام
كافل أرزاق البشر من غني ومن فقير
أذكر الوالي واصلي على سيد الأنام
عد ما يمشي القدم عد ما طير يطير
ابتدي زين المثايل وفي جزل الكلام
والمعاني للعلا قادها سلك الحرير
هبت أنسام الهواء حرك شجون الغرام
لاح برق الوسم للشعر والمعنى كبير
نحمد الله كل شي على أحسن ما يرام
نعمة الإسلام والفضل الأول والأخير
للملك عبدالعزيز أبو تركي والإمام
أخمد الفتنة وقبله رحاها تستدير
زال عنها الجهل والظلم والبسها وسام
في وسام العدل ماله حلي ولا نضير
والف قلوب القبايل ودام العز دام
في ظلال الشرع والمجد والسيف الشطير
طاوعت له مثل مشي المطية بالخطام
وساد فيها الأمن والعز والخير الوفير
شعشعت شمس الحقيقة وقام الحظ قام
والمعنى نزل الشد عن ظهر البعير
والملوك أهل الفخر نورهم يجلا الظلام
بالعدل والعلم والحلم والراي البصير
واصلوا ركب المسيرة بحنكة واهتمام
بالحضارة والتقدم على المبدا تسير
من ضميري قلتها والسموحة والسلام
العفو واللي ذكرته قليل من كثير
- صالح بن عبدالرحمن الناصر
