مرثية في وفاة عمربن محمد المسعود رحمه الله كتبها أخيه بحبر الأخوة ومشاعر النبل:

علم سمعته ليتني ما سمعته

صوّب على قلبي كما طلق رشاش

هش العضام ودمع عيني نثرته

وأثر على راسي وضيق على الجاش

وكن الحزن بين الحنايا حجرته

و الحزن ذيبن للمعاليق نهاش

قالو اخوك اللي لضيقك ذخرته

يودعك والموت ما عنه منحاش

مرحوم ياللي فالشدايد حزمته

لاجا نهار نابحت فيه الاوحاش

ياخوي عمرك بأوله واختصرته

وإلا الربوع الوقت خاين وغشاش

الليل من بعدك طويل وسهرته

عيت عيوني تهتني ليل بفراش

صورتك بيديني وراسك حظنته

مالوم عينن عنك ما ترمش ارماش

راس الطويله فالليالي طلعته

أحاول اسلا و الفكر فيه وشواش

ياخوي صوتي بالليالي سحبته

وازعجت حين من هل الطاش لطاش

وابكيك ويبكي كل صاحب صحبته

دمع الوفا ياخوي من ضيقنا طاش

وابكيك ويبكي كل درب سهجته

شوارع بريده من الضيقه اهشاش

ليت المنيه يوم جات اختبرته

وليت المنيه تعرف القرم واللاش

كان المنيه يوم جاته طمرته

وكان الردي من بين الاجواد ما عاش

مرحوم ياللي مبتسم من خبرته

يداعب اسنينه ولا ساعة هاش

يا تاج راس الطيب لا يا شجرته

كم من فقير من مكارمك يعتاش

أقفيت عن دنياك وذكرك تركته

على صخور المجد ينقش بمنقاش

عسى الولي يرسل لقبر قبرته

سحابت رحمه وترويه برشاش

أحمد محمد المسعود