جيت أقدم سلامي يا سمو الأمير
من لسانٍ يترجم صادقات الشعور
والقصايد توضح ما يكن الضمير
الغلا والوفا لك يختلج فالصدور
أنت يا سيدي سلمان قدرك كبير
عندنا له مكانه من قديم العصور
وعهدكم يذخره منا كبير لصغير
عهد صادق وحنا للعهد ما نبور
يا سلامي على سلمان طلق النظير
نادرٍ طال شبره مع أطوال الشبور
أبلجٍ طلته مثل السراج المنير
نور وجه يزود شعة النور نور
طول عمره على نهج الهداية يسير
لين عمّر من أجساد الشمايل قصور
كم وقف مع مريض وكم جبر من كسير
وارتكى للحمول اللي تقص الظهور
وكم قفل باب شر وكم فتح باب خير
محتسب والجزاء يوم البعث والنشور
طيب ذاته وتوفيق العلي القدير
الله إنه يديم له الفرح والسرور
أنت يا سيدي للجود بحر غزير
ابك ترسي سفينة نوح وسط البحور
صيرميٍ كما حد الحسام الشطير
كل ما قامت الدنيا رحاها تدور
للدعاوي طبيب وللصعايب خبير
تنطح النايبه وتحل صعب الأمور
والتحيات والنفحات مسك وعبير
يشهد الله شهادة حق ما هيب زور
سعود بن هملان الحافي العتيبي
