ليت البحر يدري وش اللي حداني
لساحله.. بعد الفياض العذيّات
وإلا يحس بنار حدب المحاني
نارٍ تحت صوب الضلوع النحيلات
والموج يرقص في حدود المواني
والهم يرقص في العيون الحزينات
وأنا هنا.. فيني يضيق المكاني
في لحظةٍ كن الثواني: سنوات
ويا مال فرقا العين كانه نساني
اللي معه سنين عمري جميلات
ترفٍ بريعٍ بالحشا زعفراني
من أول الونّه.. إلى اللانهايات
صوتٍ يهيّج بالحنين الأغاني
ويجدد بقلبي جروحٍ قديمات
أنفاس صبحٍ بلّلته الأماني
ضحكات طفلٍ للقصايد مساءات
هديةٍ ما مثلها في زماني
مَدّة كريمٍ.. والليالي بخيلات
الله يسعد دمعه اللي بكاني
والله يسعد دنيته بالمسرات
وأنا.. هنا.. فيني يضيق المكاني
في لحظةٍ ضاقت عليّ الوسيعات
الشاعر/ مقبل الزبني
