كانت تجي زايره وابطت ولا عاد جات
وأنا أنتظرها وأقول.. إن كان حيه تزور
فقدتها بين همسة حب واعتاب ذات
وحجم العتب جاء على قد الغلاء فالصدور
دورتها في مدى شوفي بكل الجهات
ورددت بالصوت ياليل.. انت مافيك نور
أعنها شوق وأجمع ما وراها شتات
وأحاول أكتب على نبض القصيده شعور
يمكن تحس بعذابي لو يطول السكات
يابري حالي ليا قلت الذهب ما يبور
عزاي منها الوفاء لوطال سير الحياة
لو طول أغيابها ما صار منها قصور
ما عاد لي شف لو صفن جميع البنات
مادام ذرة غلاها في عروقي تدور
أول غرامٍ عشقته وأول الامنيات
وتفسير حلمٍ على شانه قطعت البحور
ما زارني طيفها بأجمل الذكريات
وأسرار حب عليها حدب الاضلاع سور
من غابت العين ترقبها ولا عاد جات
واللي يعذر الغياب إن شرفت بالحضور
- موسى السلمي
