قصيدة بمناسبة تعيين صاحب السمو الملكي الأمير محمد بن سلمان بن عبدالعزيز رئيساً لديوان سمو ولي العهد ومستشاراً خاصاً لسموه.
يا شبل أبوك اللي عظيمه فعوله
يا محمد الضرغام يا شامخ الراس
أبوك في مشيه وشكله وطوله
سلمان ما مثله مع العالم أجناس
إلا أنت لا شفتك تخايلت زوله
ومن طيب فعله طبت يا طيب الساس
الخير في وجهك تهادى سيوله
مثل الحيا يا سيدي تفرح الناس
حتى اليتيم اللي فقد من يعوله
ضميته بكفك عن دروب الأنجاس
البر.. جمعية وتشكي سيوله
كلم محمد.. وأبشر برد الأنفاس
هذاك غير الناس محد يطوله
بأفعال لا تحصى ولا هيب تنقاس
تدري وش اللي يختصر ما اقوله
انك ولد سلمان فكاك الاتعاس
وأنا أفتخر في قرب محد ينوله
أني تحت رايتك عز ونوماس
ابوي رباني على كل جوله
ان الوفاء يبني للأمجاد نبراس
وختامها صلوا على أحمد رسوله
الله ينجيكم من الهم والباس
حفظكم الله ورعاكم ووفقكم لكل خير
عبدالرحمن بن عبدالله السلوم
