يا قلبي احزم ضلوعك واحسب احسابك
البعد رحلة حزن والشوق ماياوي
لاسالت دموع عيني ودع احبابك
قدمك طريق الرحيل وذيبه العاوي
ياالله يافارج الكربه على بابك
تفرج لمنهو مشاه ولا له مخاوي
دمع الغلا مع رموش العين متشابك
ويفوح من جمر صدري عوده الجاوي
ياصاحبي طالبك لايبطي غيابك
صاحبك ماهو على طول البطا قاوي
ماودي ان الزمن والبعد ينحابك
ويصير طعم اللقاء والبعد متساوي
وقت الرخا لايغرك كثرة اصحابك
مادامها صحبة هلالي ونصراوي
احيان تلقى الجحود من اقرب اقرابك
يضيق فيك الفضاء لوانت دهلاوي
ماكل صحبه ثمرها ينول لاعجابك
ولاكل راعي دلال يصير ظلماوي
وان فات وقت العتب ماينفع عتابك
خذ زبدة العلم.. والعهده على الراوي
- رشيد الفريدي
