يا مشتكي ما للشكاوي غير رب العالمين

يا ابن الحلال الناس ذي لا ضَرّ ولا مَنْفَعه

الله ذكر في ما أنزله أجر العباد الصابرين

صبرٍ على الدنيا وصبرٍ عَ الرفيق الإمَّعه

فكّر وقلّبها على كيفك وانا أعرفك فطين

هذا طريق الحق يا تتجنبه يا تتبعه

يا الله تحرّر من قيودك واهدم الخوف الحصين

ياخي لو إنه ضرسك اللي يوجعك ما تقلعه

وش ذا المحبه صاحبٍ تغليه من خمسة سنين

والآن ما تدري مكانك حافظه أو ضيّعه

يكفي تحملت الكثير وبيّن الخافي الدفين

إنسَى وهذا درس ما يُنسى وخلّك في سعه

إسمع لو إنِّي في مكانك لا يسار ولا يمين

أحكم فؤادي.. يستتب الأمن ما بين أضلعه

لو إن عمري في وصاله قلت يا موتي بحين

والله لو إن إصبعي بيضر عمري لأقطعه

أنا أعرف الأشكال هذي زين ما فيهم سِمين

دوّر مطاميع الغلا مافي المقفي مَطمعه

مواقفٍ يبنى عليها للرجال الطيبين

ومواقفٍ ما تلتقي فيها ولا عود شْمَعَه

أبا أسألك سؤال واحد والجواب بكلمتين

لا صار قدرك والهوى خصمين من تاقف معه