ناض بارق دمعتك وامطرت عينك شقاي
جمرةٍ تكوي فؤادي لهايب ضوّها
يوم سالت فوق خدك وهجها في حشاي
وانت عينك ما اذكر انه كذب لي نوها
أعرفك وأعرف مدى ودك الصادق معاي
ليه تطرين القصايد غلاك طروّها
حاول إنك تقهر الدمع لا يغرق مداي
كلها لحظة زمن لا تكدر جوها
خل صبح شفاك يجلي عن الخاطر دجاي
خلها ذكرى لقا يستحيل نسوّها
الليالي ما تغير غلاك ولا غلاي
والمحبة ما ينول العذول علوّها
عنك صلفات التفاريق ما دارت هواي
وانت شمعة حبي اللي تنور ضوّها
- سعدان عابس الرشيدي
