سلام الله على خالد بن بندر بن عبدال

عزيز الفيصلي رمز الوفا شيخٍ من آل سعود

تحية مثل براقٍ شعق برقه علينا وهل

تباشر به فياضٍ في ذرى نجدٍ غلاها زود

ألا يا مرحبا بك يا رفيع المجد شيخٍ حل

فرحنا اليوم بوجودك سعادتنا بليا حدود

كريمٍ عاليٍ قدره يطل الخير لا من طل

مثل غيث السحاب الى همل وبله يدز العود

والا يا مرحبا في نايبك تركي هلا به هل

ولد عبدالله الحاكم ولد ذروة سنام الجود

تباها حريملا بوجودكم وسدير والمحمل

فرحنا والسعاده تنبض بقلب الصبي والعود

من دقلة الثنا نبعث لكم شوق الوفا والفل

بها رجال كرامٍ درعكم لا ثارت البارود

تغني يا حمامه واسجع التغريد يا البلبل

أريج الشوق يدفعها الى هبت هبوب النود

تغني يا ربى نجدٍ جبالك والسهل والتل

أميرك شعشع حضوره وهو عيدٍ عساه يعود

وطنا يفتخر برجاله اللي شرفو المحفل

رجالٍ عاهدوا وادوا ولا زالوا على المعهود

تحت راية زعيمٍ يشهد التاريخ ما سجل

تحت راية ملكنا فزعة المضيوم والمضهود

عضيده راعي الطوله عريب الجد والمنهل

ولي العهد سلمان السعد حامي الوطن بجنود

وطنا هو فخرنا هو لجانا والذرا والظل

يدوم بعزه الضافي وحنا درعه المنشود

نرد الكيد لاهل الكيد لاجا طامعٍ محتل

ولا نسمع إشاعاتٍ تجي من حاقدٍ مقرود

خصوصاً في زمانٍ صار كلٍ ينقض ويفتل

ولكن راعي الحكمة يعرف الحق والمنقود

ترى بعض الحكي يقبل وبعض الهرج ما يقبل

زمانٍ كثرت أحزابه وزود الهرج ما به فود

ولا نقبل ولا نرضى على مهد العروبة ذل

نجدد عهدنا القايم ونثبت للوطن ونذود

عسى الله لا يغير نعمة التوحيد ويبدل

علشان العقيدة واحدة صار الوطن محسود

تجمعنا عليها رايةٍ تسمو ولا تنزل

نعيش بعزها ونثبت عليها والعزم معقود

ولا عزٍ سوا عز الله المعبود عز وجل

جميع الخلق تفنى والبقا للواحد المعبود

اختم القاف واصلي على خير الورا المرسل

نبيٍ دعوته عمت جميع الخلق بيض وسود