هب الهبوب وذعذع النسناس
والوقت دار ودارت أفلاكه
عشنا وشفنا الفرق بين الناس
ويبقى الوفا بقلوب ملاكه
البحر له سابح وله غطاس
ونتايج البحار فتاكه
اما يجي مكسبه مثل الماس
وينسى هموم الغوص وانهاكه
والا يروح ويلفظ الانفاس
من سبة الشاذوب واعراكه
دنيا العنا تعطي بدون اقياس
وتطلع بمظهر زين وشياكة
والى انكفت مردودها الافلاس
ومن غرته تستعجل اهلاكه
تشبك له الكهرب بسلك الماس
وتضارب الاشواط باسلاكه
والعاقل اللي يملك الاحساس
يحذر طريق ٍ كثرت اشواكه
يبعد عن المحضور والادناس
ويلزم طريق الشرع وانساكه
يلقى حياة العز والنوماس
ويسلم من الوقت ومن ارباكه
المجد ما يثبت بليا ساس
ولا ياصله من يقصر إدراكه
ما يهدم الامال غير الياس
وجزل الكلام يعاكس اركاكه
ومن قال غير وطول الهوجاس
يروح صيدٍ طاح با شباكه
أحمد بن سعود الحمد - الزلفي
