هو مساء عشق وإلا ليل طيش وشطانة
وش يبي هالغرير اللي شعوره نحاويِِ
مرني تلعب أيام الصبا في عنانه
غض الأشواق وعيونه عيون الهواوي
الله اعلم متى سبعه تعانق ثمانه
الوكاد انها ماهي ورا هالحراوي
ليت قلبه مثل عوده يشوق ليانه
كل مامرته نسمة تبعها مخاوي
وان تثنى يامال الكسر يالخيزرانة
وش تشوفون لو ماهو جفولٍ حياوي
في عيونه حديث الكحل ياكبر شانه
ما ترده عن مراده كبار العزاوي
الله اللي ملا عينه حنان وميانة
لين تلت معاليقي برمشٍ رهاوي
كل مالاح براقه تهادى حنانه
واهني من نزل في روض قلبه خلاوي
ان فقدته لقيت اقصى ضلوعي مكانه
وان نشدته يقول اني بقلبه فداويِ
- ضيدان المريخي
