قصيدة بمناسبة زيارة صاحب السمو الملكي الأمير خالد بن بندر بن عبدالعزيز أمير منطقة الرياض ونائبه صاحب السمو الملكي الأمير تركي بن عبدالله بن عبدالعزيز لمحافظة رماح.
بنات فكري روحت ترعد وتبرق بالهجوس
أخيالها يردم قصيد بجاش من هو عازمه
يا رماح دمتي بالفرح ما كنك إلا كالعروس
توشحي تاج الفخر عندك رجال اللازمه
يا مرحباً ترحيبة فيها (ولا) أزكى النفوس
بخالد أمير المنطقة راع العلوم الغانمه
يا مرحباً يا مرحباً والطيب يلبسها لبوس
في تركي الشهم الوفي نائب أمير العاصمه
يا مرحباً يا مرحباً بضيوفنا والروس روس
لنا الشرف بأبناء الملوك اللي علينا قادمه
رماح نادت مرحباً وجرت لها 20 قوس
ونجد العذيه جاوبت ردت صداها والمه
يا مرحباً يا سيدي يا طويق ياجال العموس
يالخالد اللي للوطن أمضيت عمرك خادمه
بالأمس قائد عسكري على الخطر رجلك تدوس
واليوم واصلت المسير ابكل همه صارمه
أقدم ولك منا الدعاء عساك سالم ومحروس
أقدم تقدم يا بطل يا سعد مثلك حاكمه
على يمينك نائبك تركي والفعل أمحسوس
النادر اللي لا مشى في علم جابه حاسمه
تدريس عاهل مدرسة وحقق تعاليم الدروس
في الأرض يفتك الرقاب وفي الجو مجده واسمه
الله يحييكم هلا وعلى جباهيكم نبوس
حياكم الله عندنا بين الوجيه الباسمه
حنا لكم مثل الدروع اليابداء اليوم العبوس
ياما وقفنا وقفتن فيها العرب متعالمه
في نصرة معزي نعم فجنا الجبال مع الطعوس
سجنا الفيافي والوعر للوحدة المتلاحمه
قبل القبائل تتحد وما بينها حرب ضروس
سبيع تمشي بالولاء وأول قبيلة داعمه
يضرب بنا عبدالعزيز رمحن اسنانه حد موس
في شف أخو نورة نسير تحت العلم محازمه
عشنا على عهد السعود ولا نساوم بالفلوس
علم دعاة البلبلة اللي بلدنا حالمه
اللي غلو واللي بغو واللي مسك فيهم عسوس
الدار هاذي باقية والضد ربي هازمه
الصف واحد والعهد لا ما تغيره الهيوس
ورث من أجيال مضت لاجيال توها قادمه
تفاخري يا دارنا تغليك يا شمس الشموس
تراك مصدر عزنا وولاك مسك الخاتمه
هذا وتمت سيدي وعساك سالم ومحروس
لنا الشرف في زيارتك ونائب أمير العاصمه
