الصوت من الشاعر/ صلاح بن جميعان الرشيدي يقول:
عسى الله يعين اللي تحرى شروق الشمس
بعد ما توارى نورها عند مغربها
همس له غياب النور عند الموادع همس
مثل همسة التوديع للي مجربها
الا ياعسى ما للمفارق وحله رمس
عسى الله يبعّد ساعة البعد ما اقربها
توارى عن الانظار راع العيون الخرس
وانا بالديار اهيم يمّة مضاربها
من امس العصر واليوم واللي ورا قبل امس
ذلول الفكر تسعى وانا فوق غاربها
أما الصدى فقد جاء من الشاعر/
عبد الله بن محمد السياري حيث قال:
ابخبرك ياذيب المساري عذاب الجمس
عن اللي حصل للشمس كدر مشاربها
على الشمس غيمٍ والسبب من عيونه هِمس
حجبها عن الناظر ونكّس عقاربها
حبيسة همومٍ ما تحمل كلام ولمس
تكج العيون الدمع والنوم حاربها
وابشرك بان النور من عقب عشر وخمس
شعاعٍ يسر النفس والعين يطربها
علومٍ تنومس من قد ايّس وباله عمس
بدت عقب ما غابت عسى الله يقربها
