يامل قلبٍ كل ما ذعذعت نود

قام يتوجد من صدوف الليالي

على وليفٍ ماحصل منه مردود

ماجا جوابه عقب جاه السؤالي

لاهوب لاحاضر ولاهوب مفقود

وجدي على خلي ويابري حالي

انا اتهيض واشتحن منك ياعود

ياللي تغني باللحون الطوالي

وتضيق بي دنياي والعالم رقود

والدمع من عيني على الخد سالي

الله يعدل ميلة الوقت ياسعود

والله يقدرني لشيل الثقالي

ياسعود هذي دنيةٍ مابها فود

تخلي العاقل يجيه الهبالي

ياخيك حذرا لايجي فيك منقود

وتطيح من عيني وعين الرجالي

وحذرا تخاوي لك من الناس مقرود

وحذرا تخلي للعواذل مجالي

ترى العرب ياسعود ناشد ومنشود

وأنته ترى ياخيك منزلك عالي

هذا من اللي داخل القلب ياسعود

شيٍ يقال وشي ماهو يقالي

ويالله انا طالبك يالله يامعبود

ترحم بحالي ياعزيز الجلالي