أكيد لازم نختلف الفرق في المبدأ كبير

قلوبنا ماهي سوى لو كنت أنا وانتي سوى

اللِّي حصل ما بيننا ياما توقَّعته يصير

لأني بدون مُؤاخذه من خوِّتك جاني خَوى

يا بنت ياما قلت لك تداركي الوضع الخطير

وياما نصحتك قلت لك ذيبي من الفرقا عوى

خلِّيه ينفعك البذخ والمال واللبس الحرير

والله لنا.. حنَّا هل المبدأ.. وأهل مالك لوا

أعرف دموعك شفتها من قبل في موقف مثير

وش فاد دمعك علّميني لا انتثر منك وهوى

عز الله إني عاقدٍ عزمي وبالله مستخير

على الفراق اللي نويته مثل ما قلبي نوى

اللي حفظته منك ضيّعته ولو هو قول خير

ما عاد (حَدَّث) عن غرامك خاطري ولا (روى)

صرتي مثل عرق الظهر يصلب على النصف الأخير

عرق وكويته بعد ما عَيَّا يفيد به الدُّوا

وضعي صعب وانتي تبين تساوميني.. والمثير

ما أنتي فقيدة ماضيٍ طويت رأسه وانطوى

مع ذا.. وهذا قلت لك روحي.. وسِرِّك جوف بير

ماني على أبوي لو طلع سِرِّك لو القاوي قوى

أهم شيء أروح منك الحين مرتاح الضمير

اللِّي بقلبي كلمةٍ من ضيق ماهي من نوى

تَنبّهي لي واسمعيني زين مشكوره كثير

على هدايا الصدّ.. والزلاَّت.. وأسلوب الغوى

تلقين من يقدر ينسّيك الغرام المستطير

وأنا بعد مثلك بلاقي من يُوسِّدني الهوى

لو ما اختلفنا ما افترقنا.. ما تبي هذا يصير

المشكله حِنّا سوى.. وقلوبنا ماهي سوى