غبتي وجت بعد الغياب الديمة
يالله عساها غيبةٍ عادية
ما ادري غيابك غدر ولا شيمة
لكنّ نار الحب فيني حية
حتى لو ازعل منزلتك مقيمة
احسبك فيني واحسب إنك ليه
ياحي هالطلة وهالتسليمة
لاعلها مربوعةٍ مثنية
انتي بدنيايه سوات الغيمة
يالله عسى لي في ظلالك فية
ترا المحبة والفراق إوخيمه
في جوها ماغردت قمرية
وانا ادري العالم غلط تعليمه
نصيحتي والله علم بالنية
والغالي اللي ما عرف تقييمه
لوكان غالي عشرته منسية
من دون تحليله ولا تحريمه
الحب دربِ سكته ماطية
والقلب لو بقدر على تقسيمه
خليت نصِ لك ونصِ ليه
عبد الله بن راجس
