اشتقت لي من سنين طوال ادوّرني

ذبحني الشوق طوّل عنّي غيابي

بعيد واجد ولا أدري وش مصبرني

طوّلت ما وقّفت رجلي على بابي

يشنقني الحزن لا قمت اتصورني

ويمر طيف أمس بين العين واهدابي

أول الى ضاق صدري قمت أحاورني

واليوم أحاور غريبٍ يسكن ثيابي

بعضي من الوجد يبكي لا تذكرني

وينهار صبر السنين وقوّة أعصابي

أحيان أحمّل شقاي الوقت واعذرني

وأحيان أقول إن هم الوقت باسبابي

وأحيان بعضي يصد من أجل يقهرني

ويصد في عين خفّاقي عن احبابي

لفصول عمر التعب طوّل يحيّرني

وفصل الهنا ما يجي سطرين بكتابي

يا بعضي افزع معي لحظة وشاطرني

لا تلهي أرجوك وتخلّيني أشقى بي

عطني حنانٍ عرفته فيك و امطرني

بالله لو من بعض ما تعطي اصحابي

كيف اشرب الهم والايام تكسرني

قدّام عينك تقل ما انت أقرب اقرابي

وانا احسب انّك من العثرات تجبرني

واثرك تحرّى خطاي وفوز طلاّبي

كنّي تخاطيف حلم احترت اعبّرني

اضيع في داخلي لاجيت ابابدا بي

ذنوب عمر وعسى منها يطهّرني

سجود قلبي وتسبيحي بمحرابي