صوت

يا فهد ما تحس إن اللقا حان

بين حرفي وحرفك يالسنافي

يا رفيقي ليا من الزمن شان

يا نديمي على كشف الخوافي

يا فهد والوجيه أشكال وألوان

بيَّض الله وجهك يا أنت وافي

لو مليت الورق لولو ومرجان

ما يلبّسك ثوب الطيب ضافي

يا فهد يوم ليل البارحه زان

والقصيد متوهّج ومتلافي

يوم شفت الورق شاحب وعطشان

في سطوره يذرّن السوافي

جيت أغنِّي على عذبات الألحان

والطم الموج في جال القوافي

واقدح الحرف لين يهلّ هتان

وان بكا الغيم من حظ الفيافي

ما تهيّضت لين إن الخطا بان

جيت أعلّمك عن سر اكتشافي

القصايد بصدري شانها شان

تجتول والسما ماهوب صافي

قلت وامطرتها من قلب ولسان

وازهر العشب في كل الاشافي

لا تقول انت وينك بعض الاحيان

لا تخلّيت واعلنت التجافي

مالقيت لسباق الحرف ميدان

يا اخي لامتى والنور طافي؟

***

صدى

والله إنِّي على ما قيل شفقان

وأتحرَّى وأنشّد كل لافي

يا الربع يا الربع وش قال ضيدان

ما كتب شي؟! وش بالشعر غافي

كنت أتابع عساي فداك ولهان

وكل ما تكتبه للنفس شافي

ما دريت إنّ فضلك هلّ عرفان

لين قامت تباهى به ضفافي

يا ابن الأجواد هذي منك صفطان

لا تقارنِّي بشعرك عوافي

يمكن أشجيك في لوعه وحرمان

مير ما يطرد الخيّال حافي

وانت شعرك يحلّ بكل الأوطان

له بكل الصدور أجمل مرافي

والاّ الاخوان يا ضيدان عدوان

ملّلونا ولمِّع كل هافي

والله إنك تعرف فلان وفلان

وتخبرهم وشوف العين كافي

ما لهم في القصيد عنان وحصان

وصاروا أهل المقابيل المقافي

وانت أعرفك وسيع إدراك وبطان

ما انت مثلي ثقالي هي خفافي

أعشق الشعر لين أدمنته ادمان

واتهرّب وثالثة الأثافي

لين شفته جرحني حُر ومهان

ولين عفته يعيّيني عيافي