(1)

نكون أصحاب..

وإلا ما نكون أصحاب؟

نكون أحباب وإلا ما نكون أحباب؟

أنا أدري عن الخافي..

وضحك الناب، مو كافي

أبد يالهاجس إللّي تشبه الكذّاب

مو كافي أبد والله نكون أصحاب..

***

دخلنا الشارع الخلفي

نبي نخفي تعبنا عن كلام الناس

وكان الشارع الخلفي..

كلام الناس..!!

وأنا ما أدري..

إذا كنت أعشقك بالحيل..

وإلا أكره وداعك؟

ولا أدري..

عن إللّي يذل في هالليل

هي أوجاعي أو أوجاعك؟

ولا أدري أصدق مين..

وأكذّب مين..

إذا قالوا:

شراك بْغَالي الإحساس..

أو باعك؟

طرقت الباب..

خذني لك.. وصك الباب!

ترى هالكون من حولي وحولك..

يوجع الأعصاب..

وكن الأرض بحر من الغدر والخوف

وشواطي من حزن وعتاب!

(أنا مُتعب..

أنا مغضب..

أنا مسلوب من كل شي..

إلاّ غصةٍ فيني).

أشوف الكل في حيرة..

وأنا بحيرة..

على وين السهر هذا بيوديني..؟

يجي صبح ويعدّي صبح

ولا نورٍ يقدِّيني

ولا شمسٍ تدفيني، ولا أحباب.

شقيت، وضاق صدري من حياة الغاب؟!

وش الأسباب؟

(لا تسأل).. لا تسأل عن الأسباب..