ما دريت ولكن البارح دريت

انّها الفرقا حزينه يوم راح

طاح من عيني حديث ولا حكيت

كنت اضمّه بين جفني بس طاح

باح من عين الحزن يوم انتهيت

والمولّع لا تلومه لين باح

كنت ادوّر في ذنوب ولا لقيت

وكنت ادوّر لك معاذير وسماح

لو تعلّمني متى هجرك نويت

كان أعرف إن الهوى ما به مزاح

آسف ولكن مع الذكرى سريت

من بداية هالغلا لين الجراح

ودِّي أعرف كيف في لحظة قويت

تاخذ من الروح كلمة ارتياح

لو نسيت انِّك بليله لي شكيت

وانِّي اللي شلت دمعك يوم ساح

وكنت أحاول أسعدك لين ارتويت

ولين بعد الدمع فجر الثغر لاح

ولو ذكرت اشوي في قلبك قريت

كان قلبي لك عن جراحك جناح

وانِّك أول وانِّك آخر كل بيت

وانت ليلي وانت في ليلي الصباح

سال من سحب الظما هجر وظميت

ومن غصونك يالشجر خافت رياح

لو نسيت فصدِّق اني ما نسيت

انِّك اللي خان وافي واستراح