الحب ماهوب قسمة بيك وبيني

أرجوك خلك بعيد ولا تواسيني

ما تدري ان اكثر همومي من اسبابك

ما تدري ان الجفاف اهلك بساتيني

وماتت بذور المحبة قبل تحيا بك

ما تدري انك طفيت اعظم براكيني

والشوق ما حَسّ في جيّتْك وغيابك

الحب ماهوب قسمة بينك وبيني

هذي حقيقة وعنها تقفل اهدابك

ما تشوفني شيّ مهما قلت تغليني

واتعب ولا همّك الا نفسي تهابك

والعِشرة اللي من اتفه شيّ تلغيني

تجبرني اسكت قبل لا تفلت اعصابك

والدمعة اللي تمسّي خدي وعيني

أرحم منْ اشفاهك اللي تخفي انيابك

من وين ماروح ألقى الضيم لاقيني

لا انفك ّ ضيم ٍبقى باقيه متشابك

واكتم بصدري قهر لا جيت بتجيني

والروح تزفر مع العبرات (وش جابك)!

ويقتلني انك بخيص بكل ما فيني

ومع كل هذا تدوّر حق ل عتابك

وانا اللي اخلق لك الأعذار وارضيني

لو كان بعض الذي قد صابني صابك

لا طاح قدري وقلبك ما يراعيني

فما عاد عندي رجا أبقى من احبابك

النفس ودي لو اخنقها على يديني

وَ لا انّها ترخص بطرقي على بابك

الله يجبّر كسوري باقي سنيني

والله يعوّضك باللي توصل إعجابك

- عبير بنت أحمد