Friday 29/11/2013 Issue 15037 الجمعة 25 محرم 1435 العدد

التقاعد والفقر حطم كيانه

من قبيل الصدق والكلمه امانه

ما صدق ياكود من يصّدق شعوره

السكوت احيان للساكت اهانه

الحرام يباح في وقت الضروره

دوروا لي خايفً روض حصانه

لاجل تصبح كلمة الصابر جسوره

جاري الشايب محقن في بيانه

قبل مسمع شكوته ما مل شوره

كلمةً من شايبً يشكي زمانه

قالها مقهور والغصه بزوره

لو خجل منها قبل ولجم لسانه

لم تعد نفسه على صبره صبوره

من خدم داره وذل العمر شانه

ليش داره همشه واهمل لدوره

العمر افناه و الميثاق صانه

ما حصل منه مع الشدات بوره

التقاعد والفقر حطم كيانه

عقب كل التضحيه يشحذ فطوره

القوي المغتني الدار عانه

منزله مد النظر ما طال سوره

والضعيف الدار زاده في هوانه

ما سال عنه ولا همه ثبوره

مشكلة جاري ماهو راعي ميانه

لا وزير ولا لعب في الصغر كوره

بس ابنٍ للوطن دم و ديانه

ما يخون الدار لو طاله قصوره

لو يخونه من تحصن بالحصانه

ماخذٍ خيره وماشي في دبوره

مكثر العارف وتسمعني اذانه

بس وين اللي مباديهم غيوره

بين مضمون الميانه والخيانه

تكتمل يا دار في واقعك صوره

صورةٍ لو تنعرض صارت ادانه

تكشف المستور وتعكر سروره

ما تخلي كل مسؤول بمكانه

لو قوى باسه وعاند في غروره

- سعد الشقحاء