من الراس للراس
اعمل ترى الدنيا للأعمال كالبنك
ما حاشته يمناك تلقاه توفير
دامك نشيط فكل حيٍ إيعاينك
وإن طحت فالمظما وطتك المظاهير
المال ليشان العمل ما يزيّنك
يا من قضى عمره بجمع الدنانير
إزبن على الله عن ذنوبك يزبّنك
ما غير رب الكون للمذنب مجير
- عبد الله السياري
تغانم الساعات والعمر مسروق
مثل الغصون اللي تساقط ورقها
وان كان قالوا كل مطرود ملحوق
شف دورة الأيام ما حدٍ لحقها
واعشق علوم الطيب والطيب معشوق
عند الرجال اللي تزايد وفقها
واعرف ترى مالٍ بلا جهد ممحوق
حكمة حكيمٍ في زمانه نطقها
- عايض أبو شيبة
يالله لا تجعل نصيبي على جال
جرفٍ ليا قرّب له الماء يليني
يالله لا تكتب لنا شين الأعمال
يا قابل التوبة من التايبيني
يالله لاتقرن حياتي بالأنذال
اليوم ولاّ مقبلات السنيني
يالله لا تملا يديني من المال
إلا بقدر العيش والغانميني
- فيصل الرياحي
دنياك يا لغافل بها الوضع مقلوب
ترميك ما بين العلا والطماني
يا ما هفا به من جماهير وشعوب
راحوا وساقتهم ظروف الزماني
لا شك من لا يتبع الحق مغلوب
ولا يسهج الواجب لكود الهداني
- عبد الله بن عبار
