البرق المقفِّي

تعب غصني يلوّح للسحابه

تعبت أنادي البرق المقفِّي

إذا صار العطاء رهن الطلابه

نهتني شيمتي لا أمد كفِّي

لباس المن مالي به مهابه

الا يا نفس ضحِّي به وعفِّي

يموت الحر في بالي ثيابه

ولا يلبس جديدٍ ما يوفِّي

مشيت العمر في دروبٍ تشابه

ظواهرها سوى.. واللي تخفِّي

دعاني داعي مذكور بابه

طرقته والشراب العذب شفِّي

لقيته يم محفوف بسرابه

لو أظما له عمر.. ما أظن يكفِّي

يا ليت الصدق ماهو لي قرابه

يورّطني.. ولا يوقف بصفِّي

أبنسى هالحلم واطوي كتابه

يا كثر أحلام منسيّه برفِّي

أبا اطلع فوق عن عذر الإجابه

وعشّاق الشماتة والتشفِّي

دمي كبريت .. والأحزان غابه

أبا حرقها .. ولا أبغى من يطفِّي

- الشاعر/ مهدي بن سعيد