البر متعة

ما يشرح الخاطر ويبعد همومي

الا الخلا ومرافقةٍ كل دندون

أحب شوف البر لو ربع يومي

كني بشوفه مالكٍ مال قارون

البر متعة والعمر ما يدومي

والوقت ما يصفى على ما يقولون

خلوني أدله في طويل الرجومي

وانسى شقي نفسي وما كان مكنون

مالي بجو الدار لحدٍ يلومي

شوف الخلا ما له مثيلٍ ولا لون

فيه انشراح البال وأجمل حلومي

جوه يخلي القلب سالي وممنون

مع شبةٍ للنار حسب السلومي

وادلال رسلانٍ بها البن مرهون

فنجالها كايف ويقضي اللزومي

يبعد عماس الراس لا صار موزون

هذي طراتي بين كل العلومي

وكلٍ على كيفه يشيد له حصون

- نواف بن محمد الصخابرة