بعض الوجيه

إن بلاك الله بشخصٍ ماتبيه

اطلب الله عن طريقك يقلعه

جامله واصبر على بعض الوجيه

والفضاء ماضاق والدنيا سعه

ومن شمت بالناس ماجاهم يجيه

ومن ظلم يِظلم ووقته يصفعه

ومن يبيعك لا تفكر تشتريه

ومن شراك اشره ومن باعك بعه

ولا ترهرق للئيم ولاتجيه

عز نفسك وان حكابك اردعه

ولاتطيع النذل أو تشره عليه

من عصاك اعصه ومن طاعك طعه

من يريد الخير يرضي والديه

ومن تواضع لازم الله يرفعه

لاتظن كل شخص له رايٍ وجيه

بعض الأريا ماربح من يسمعه

ذي خلاصة تجربة شاعر نبيه

يبني بيوت القصيد ويبدعه

- الشاعر/ نايف العبيد