الثلج والنار

سولف بخورك سر عذبات الاسرار

واستودع التفاح كل التفاصيل

ليلة وفيها ذاب همسك والاشعار

مابين نهرينك تطيب التعاليل

يغري ظلالك كل نسمات الاشجار

على غصونك تورق الشمس والليل

عذوبتك تأثيرها فاق الانهار

سهرت عند الناعسات المضاليل

مرة فناجيلك تسولف عن بهار

ومرة بهارك ينفتن بالفناجيل

ماقلت لك لاتقرب الثلج والنار

على مواصل سهرتك فزة الخيل

ماذقت احلا من جنا طيب الاثمار

ليلك يجيب السامري والمواويل

طاب اللقا ومواعدك غيم وأمطار

بك ربعت دنياي سيلك غطى سيل

الشاعر/ محمد العريعر - الرياض