حديث الحب

أنا ماعيش معك الحب.. أعيش الحب كلّه فيك

أنا وإن كنت عنك بعيد.. لكن معك واحيا بك

تعيش بكل أحاسيسي وتفكيري وأعيش أغليك

تحسد الحب لو تسمع حديث الروح بغيابك

تزاحم فالخفوق قلوب يسري نبضها بيديك

أنا كيف أختصر فيك الشعور بحضرة أحبابك

سكنت أرض الغياب وكل سيرة للوفا ترويك

عيونك موطن وغربة.. عيونك موطن أغرابك

أحبّك.. لو تسافر بي على درب التعب وامشيك

حبيبي في زمان البعد قلبي أصدق أصحابك

أحبك.. جرح ما يبرى عسى بعض الألم يرضيك

وألوّن بالرضا عيني واسيل دمعة عتابك

حبيبي.. في ظلام الشوق كل النور ما يضويك

أنا صفحاتك البيضا وانا أصدق حرف بكتابك

فرشت العمر لأيامك أسابق ليلتي وأجيك

وعرفت ان الغلا خطوه وانا واقف على بابك

جفون الغيم لو تمطر دريت ان الثرى ضاميك

ودريت اني بلا موعد.. زرعت الحلم باهدابك

- الأمير الشاعر/ د. سعد آل سعود