شاعر وأكثر من صورة

أوصاف

الكامل الله وكل الناس فيهم قصور

لكن بعض الاوادم لا تحطه خوي

اللي يشيل الحسد واللي يشيل الغرور

واللي يسوي على الشخص الضعيّف قوي

* * *

فقر

الآدمي لو يشتري راحة البال

مايشتري حب البشر من حلاله

ولا صار اسم رجال ماهوب رجال

فقير جاه وقدر لو زاد ماله

* * *

بصيرة

لو العلا ما تعز الروس ما ريمت

يا هون درب النزول وما اصعب الطلعة

ولا كل سلعة ليا جت سوقها سيمت

السوق يحكم على البياع والسلعة

* * *

استغناء

أضيق و يبشرني الله بالافراج

ولا خاب من له عند ربه مطاليب

وان كاني للناس محتاج محتاج

احتاج دعوه صادقة في ظهر غيب

- ضيف الله غزّاي