مواقف الأبطال تبقى عظيمة

لاصار ما للمدح فعلٍ يوازيه

نقصٍ على الشاعر وظلم وظليمه

امدح كريمٍ كاملاتٍ معانيه

واترك بخيلٍ مايذب الخريمه

كم واحدٍ فعله مع الناس يعْليه

وكم واحدٍ منه الجمايل عديمه

وكم واحدٍ يكبر وتكبر هقاويه

وكم واحدٍ عنه الهقاوي حشيمه

ولا كل رجلٍ فالشدايد تناديه

شدايد الوقفات تبغى صتيمه

انص الشجيع اللي فعوله تحاليه

حلال صعبات الأمور الجسيمه

اليا عطاك الراي ماهوب يخطيه

رايه مع العربان مثل الوسيمه

وليا نواله فعل مأحدن يجاريه

يحتاج له صبر وثبات وعزيمه

ماهوب تلحقه الرجال المشاريه

تنصاع له روس الرجال الحكيمه

هذا ومن مثله من الناس تغليه

ومواقف الأبطال تبقى عظيمه