العين طايب لها المرقاد
ستاير النوم مرخيها
بعد التهجد مع العبّاد
بصلاة ليلٍ نصليها
وبعد السهر والصيام أعياد
نبي نتريّح ونرضيها
النوم للعين مثل الزاد
لا تسهر العين توذيها
كثر السهر يثر الإجهاد
لا صرت ما انته مضريها
في واجبٍ واللزوم قياد
و الا عشيرٍ يلاحيها
والا بعلمٍ يفيد عباد
وعينٍ عن الدار تحميها
ومع غيرهن لايجيك سهاد
أحفظ نشاطك لتاليها
العمر لو طال فيه الماد
مثل الرعية وراعيها
شوف الشجر لا رعيته زاد
ويابس بالإهمال ناميها
اسأل مجرّب بخيص وفاد
تجارب الوقت يهديها
- حمود بن ثمرالقصيري