سيّرن نشادة البال عن ليل الهجاد

من هنا مرة تجيني ومرة من هنا

هاجس يملى ضلوعي سواليف ومداد

كل ما هز المعاليق قلت الله لنا

قال من طش المجاديف قلت السندباد

قال من غنى له النجم سامر، قلت أنا

شاعرٍ ماله من البيد خبت ولا حماد

غير ظلٍ لو احنى الريح غصنه ما انحني

جيت من عشب المواعيد, يادروب الحصاد

خطوة تلغي وجودي عساها للفنا

حالف اني لا عكس الريح واخذها عناد

لين تلقح عاقر النود برعود الضنا

ياخفوق حده الشوق واغراه الهداد

لا دنا ليل التاريخ غرباله دنا

كل قلب لا عه الوقت جرب واستفاد

وش لقيت من التجاريب يا قلب العنا؟

يازمان ما رسى بي على شط الوكاد

كذب الساري موانيه وشطوط الهنا

يارفيق ما هداني على رأي سداد

بين ذنب ما جنيته وذنب ما جنى

لو سقينا وردة الحلم ترياق السواد

ما نبت في مرتع الشوق برق ولا سنا

لا تصدق بألف ليله وكذبة شهرزاد

كل عشق للحنايا تطوى وانثنى

خل عنك حكاية القيظ وعلوم البراد

كلنا نعرف سببها ونجحد كلنا

ما نسمي كل من حج طارق بن زياد

لو شرب من بير زمزم وصلى في منى

من يشب بمحجر العين طريا للرقاد

من يقول انه عن النوم كله في غنى؟

خانت المسرى ذلولي وكسرت الشداد

بلغوا بيض المقابيل مردود الثنا

ول، لا عادت طواريك يا ليل الهجاد

من هنا كنت احتريها، وجتني من هنا