نبدأ هذه الرحلة مع هذه الابيات والتي قالها بمناسبة ذكرى البيعة الكريمة للمليك خادم الحرمين الشريفين الملك فهد بن عبد العزيز,, حيث يقول:
ابدي بذكر الله راعي التدابير
اللي تخير فهدنا له خليفه
خليفة الرحمن تاج المغاوير
ابن العظيم اللي سيوفه رهيفه
يا شايل عنا حمول المشاوير
يا مغرق بالجود شعبه وضيفه
أوسعت أرض الله روعة وتعمير
واعطيت كل مبتغاه ورغيفه
واغنيتنا بالفضل ما منك تقصير
وعلمتنا فكر العقول الحصيفة
حكيم يا حلال كل المعاسير
يا دوحة بالعز خضرا مريفه
يشهد لك البيتين يا باذر الخير
وتشهد لك نفوس كريمه عفيفه
في عهدكم مولاي كم غرد الطير
وكم بسمة طفل رسمها لطيفه
وفي ظلكم عشنا الهنا والتباشير
ربيع كل أجواه برده وصيفه
أمن وأمان وراحة طعمها غير
يسلم حبيب الشعب نعم الخليفه
كذلك يقول ·اسير الشوق في احد القصائد الوطنية:
رفرفت بالعز من فوق الرمال
سيدات السلم نيران الحروب
بارقات خضر بالعالي طوال
نورها ماهو عن العين محجوب
في وطن تفداه روح وراس مال
من ورا شيخ جمع حب القلوب
يا جنوبه شفتك بعين الشمال
وياشماله عشتك بنبض الجنوب
ويا شواطي تصطفق من كل جال
بينهم ود مع النسمة يجوب
ويا غرام حط في نجد الرحال
عن هوى عذرا الجزيرة ما يتوب
موطني يا مجد سواه الرجال
وفاخرت في سيرته كل الشعوب
لا لفحنا القيظ شفناك الضلال
والذرى لا صارت الدنيا هبوب
انت يا اجمل كثير من الخيال
وانت يا شمس فلا تعرف غروب
وفي قصيدة اخرى يقول فيها وهي مهداة الى صاحب السمو الملكي الامير سلمان بن عبدالعزيز:
نجد يا شمس العرب والجزيرة
نحمد الله على حبك فطرنا
يا وطنا كلنا لك ذخيره
لا نوى الباغي بك الشر ثرنا
من ورا شيخ يقود المسيرة
وتحت راياته مشينا وسرنا
المليك اللي الملا تستشيره
ابوفيصل عزنا مع فخرنا
وقال هذه الابيات بمناسبة شفاء صاحب السمو الملكي الامير سلطان بن عبدالعزيز النائب الثاني لرئيس مجلس الوزراء ووزير الدفاع والطيران والمفتش العام حيث قال:
استبشرت يا سيدي فيك الافراح
وتهللت بيض الوجيه بهناها
النوم رد لعيننا عقب ما راح
وهمومنا ولت وراحت وراها
وصار الشعر في روضة الحب صداح
وكل المعاني غردت يا غلاها
وفي رائعة أخرى يبدع سموه في هذه الابيات:
خلوا الشاعر يوجه في شراعه
في بحور الشوق وبحور الطرب
لا تحسبون التعب عندي صناعة
ويفهم المعنى جميع اللي تعب
ذقت طعم الحب في سن اليفاعه
لين فاض الشوق والشعر انكتب
ويقول في هذه القصيدة:
اقوم من ليلي واصبح على ليل
وما ادري النهار اللي يقولون وينه
مشغلني اللي مشغل البال بالحيل
واخفت شعاع الشمس غرة جبينه
المترف اللي لا عني بالمظاليل
واطبق جفونه بين عيني وبينه
لاجله تحديت البشر والذي قيل
ولاجله نذرت العمر واغلى سنينه
كذلك يقول في قصيدة اخرى:
انصفيني جيت واعلنت انهزامي
باختصار بلا سلام ولا تحيه
لو نسيت لو دقيقه يا غرامي
الدقايق كلها تشره ,, عليه
موغريبه ليه ما ارجع في كلامي
اعترافي بالخطا ما هو خطيه
التزامي وين أنا وين التزامي
والله ان الموته اهون يا بنيه
كيف اعاف الما وانا ملهوف ظامي
كيف اعاند نبضة القلب الوفيه
يا هوى اشتقت والشوق اهتمامي
انت الاولى ولا لي بالبقيه
ومن مكاني كان والله ما يلامي
لو سعى لرضاك في روحه وجيه
وش اسوي وانت الحلم فمنامي
وفي صباحي والمسا وعقب العشيه
هذا انا كلي رجعت اعزف هيامي
رافع راسي وقلبي بين ايديه
انصفيني دامك بعمري مرامي
ودامك اغلى من مشى وسط البريه
وفي هذه القصيدة الجميلة يقول:
ترى ما عاد بي بالحب شده
تعبت تعبت من لهو العواطف
انا منك الوفا كنت استمده
وكنت لخاطر عيونك اجازف
حسبت اني الوحيد اللي توده
واثر يا كثرهم غيري ولايف
انا قلبي عليكم وش يحده
مدام اني با ذوق الكلايف
شعوري ما يتحمل فوق حده
ولا يقوى على ظلم العواصف
هواي اللي خذيت ارجوك رده
نويت اودعك ويش انت شايف
ومن رائعة اخرى لسموه فيها يقول
على البال
كل التفاصيل ,, على البال
واحلى التفاصيل ,, على البال
والحل والترحال والنار والهيل
والقمرة اللي نورت ليل ورا ليل
والنظرة المكسورة
والبسمة المقهورة
والخطوة المغرورة
واحلى المواعيد ,, دايم على البال
مدري إلى اليوم ولا الزمان انساك
يا قلبها قلبي
ويقول :
هلا باللي تمنيته سنين وشافته عيني
انا شفتك حقيقة عقب هوجاس وسهر واحلام
كثير اجمل من اللي شفت واتخيلت
كثير احلى من الواقع كثير اجمل من الالهام
انا جرحي حملته لك دخيلك بس داويني
ونسيني عنا شوق وهمي ولوعة الايام
انا ظامي وتدري زين وش اللي منك يرويني
ابغرق في نهر قربك من اطراف القدم للهام
لمحتك قلت ما شاء الله يا زين المزاييني
على روس العذارى تاج وفي وسط الكلام انغام
حسدت بشوفتك عيني حسدت بلمسك ايديني
ومن زينك لو اني حاسد نفسي ترى ما انلام
خطفت من القمر نوره وصرت دوم تضويني
ولا غيرك يهز القلب ولا غيرك بحضنه نام
ومن قصيدة اخرى يبدع فيها اسير الشوق
احترفت الصمت قبل القى عيونك
ما لقيت فتون يسرق محتواي
البدور اللي سروا لو يشبهونك
كان لك ما جرت العشقة خطاي
يا حياة العمر وش عمري بدونك
ويا مرام الروح وش روحك بلاي
روعتك في رقتك حتى بجنونك
كنك الغريد في عالي سماي
العذارى من جمالك يحسدونك
وفي جمالك اتباهن في غناي
يا منى القلب المولع في فتونك
منفتن لا تسأليني وشي بلاي
كذلك يقول في هذه القصيدة الرائعة وما تحمله من قوة في الوصف حيث يقول:
نال البطولة والبطل فواز جاب مرادنا
من عادياتك يالسبق هذا حصان ابن الفهد
ابن العزيز اللي تغنت به بلابل ودنا
ابن الكريم ابن العظيم ابن العضيد ابن السند
خيلك بفعله هزنا حتى روينا سعدنا
يا سعدنا بنصرة ويا سعدك بفواز السعد
به صورة لامجادنا وذكرى فعول اجدادنا
حوافره ترسم على وجه الثرى وسم البلد
منا خذا عوايده والفوز بعض اعيادنا
تشهد لنا صولاتنا والمبرق اللي ما اتعمد
مبروك قلنا ها بصوتك يا الغلا وبمدادنا
يستاهل الكاس البطل من جد عز الله وجد
ونختتم رحلتنا مع هذه القصيدة التي قالها بمناسبة شفاء صاحب السمو الملكي الامير: سلطان بن عبدالعزيز النائب الثاني لرئيس مجلس الوزراء ووزير الدفاع والطيران والمفتش العام اثر عودة سموه الى ارض الوطن ,, حيث يقول:
عوّد النور يملا عيوننا يا هلابه
ويا هلا بروحنا اللي شالت أجسادنا
يا هلا بالوفا والمرجلة والمهابه
يا هلا بالسرور وبهجة أعيادنا
جيت واستقبلك فهد العرب في رحابه
وشع نورين وغنت فرحة أمجادنا
اقبل الطيب هلي وامطري يا سحابه
حقق الله بشوفه غاية مرادنا
عزنا اللي تحط دروبنا عند بابه
وحبنا اللي يعانق نبضة فوادنا
نحمد الله عطانا جيته من غيابه
أشهد أنه كريم وبالسعد جادنا
سيدي ما يوفي وصفنا في جنابه
وش نقول لسندنا اليوم وغمادنا
المعاني تطول وتنتهي في عبابه
والبحر ما تطاول موجه أبعادنا
