|
|
|
بسم الإله مكون الكون كله
اللي تسابق رحمته كل من تاب
علام ما تخفيه دقة وجله
هو الكريم اللي للارزاق وهاب
الا هنا تبدأ بذكره رضاء له
واللي يدور عطف واليه ما خاب
هذا وقلبي قام همه يتله
حتى انفتح للشعر مما حدث باب
تعبير عن ما في الضمير وحصله
ماهوب من باب الطرب ولا الاعجاب
علم سمعته ما قدرت احتمله
قالوا توفى كاسب الطيب شباب
يالله عسى جنة عدن منزل له
آمين يا رحمن يا رب الارباب
استقبله بالعفو عن كل زله
المسلم اللي جاك للعفو طلاب
خلته الايام ثم رجعن له
بسر الذي يعلم مقادير الاسباب
ابوسعد نطاح عسر الشكله
لا كبرت القالات يحسب له حساب
مقراص ماص كل عقد يحله
تفخر بذكره بين اصاحيب واجناب
شيخ ليا منه هرج ما تمله
ماهوب في هرجة مبالغ كذاب
ولا هوب من يمشي على كل مله
اللي على اعراض المخاليق شذاب
والضيف لا منه لفى عانين له
يلقى حسن جانب وحشمة وترحاب
الطيب ورث وارثه من هل له
من ماجد وهاجد مهديه الاصعاب
كم شيخ قوم سيبوا فيه خله
ان مات ولا عاش بالغبن منصاب
افعالهم تشهد عليها الادلة
يوم العرب ما بين غازي وحراب
وبيت الشرف ما يختلف عن محله
مجود بيت الشهامة بالاطناب
فيه النشاما طيبين الجبله
عياله اهل الجود دسمين الاشناب
الكل منهم في المعالي موله
ولا لهم عن منهج العود مجناب
واعود واذكر خالق الكون كله
اللي تسابق رحمته كل من تاب
|
 |
|
