|
|
|
في فقيدة هل القرنه وكل القبيله
احسن الله عزاكم كلكم يا جماعه
القضاء والقدر ما فيه للعبد حيله
البنادم ولو طالت حياته وداعه
ليلة العيد فاجانا القدر في رحيله
الخبر عن وفاة دحيمو فجعة وراعه
راح من يعشق العليا ويهوى الجميله
راح كساب قولة نعم في كل ساعه
عز من يطلبه جاهه ومن يلتجيله
مزبن اللي غثا الايام والوقت لاعه
لو تشين الليالي ما يغلق حصيله
مظهر سمعته فعله ومدة ذراعه
اشهد انه جمع كل الخصال النبيله
نادر في زمانه بالكرم والشجاعه
عاش عيشة شرف ما عاش عيشة رذيله
التجارب من الدنيا عطته القناعه
ورث المجد للاجيال من عقب جيله
منهج من يبا العليا مشى باتباعه
يا لله انك تظله في الجنان الظليله
تجعل الله عمل مع رحمتك له شفاعه
وتبقي اللي بقى بعده سنين طويله
الثلاثه لهم درب المراجل ولاعه
جعلهم في المراد بكل يوم وليله
ياكريم سجد له كل مومن واطاعه
|
|
يالله اني طلبتك وانته المستعان
ويالله انك على درب الرشاد اتهداني
ما كتبه الولي للعبد يالعبد كان
وما كتب في جبينك جاك يالمودماني
يوم قالوا خويك مات ولاجل حان
سال دمعي وغرقني وأنا في مكاني
وش بلى الموت ما ياخذ وليد الهدان
قام يأخذ من الشجعان قاصي وداني
غاب نجم الجدي وسهيل ما عاد بان
كيف نسلى وندله عن سهيل اليماني
كيف نسلى وانا وياه مثل الخوان
شمري بس اعده واحدا من اخواني
ليتني زرت عبدالله بعيد رمضان
قلت اباجيه بالاضحى وفات الاواني
يعساله بجنة عدن بيت ومكان
بين حور اربعين وسط خضر الجناني
وياعسى القبر مد الشوف شوف العيان
ويا عسى كل سياته تبدل حساني
ما خلق مثل عبدالله عيانا بيان
خلق عبدالله العطليس ما فيه ثاني
الكرم فيه والمعروف هيف السمان
فاتحن باب بيته لويشين الزماني
ما حسب للخساير لويشين الزمان
يعطي الجزل راع الجزل ذرب اليماني
من شيوخ على وقت الفرس والحصان
العداء لسمعت لصواتهم ماتداني
من سلايل رجال جارها مايهان
جارها مايهان وضيفها مايهاني
وسمحولي لياء قصرت عجز اللسان
لو بعدد فعول الشيخ يعجز لساني
|
|
السبت هذا صباحه او مسا الجمعه
ضيعت انا اليوم مدري اليوم ضيعني
صارت هموم الدهر في وجهي مجتمعه
ودروبي الاوله عيت تطاوعني
صرت ارسل دموعي دمعه من ورى دمعه
واحاول انسى والى الذكرى ترجعني
ياشين علم سمعته هز من سمعه
اي والله انه بهاك الليل روعني
خالي ندي الكفوف وباهي الطلعه
يطلبني الحل؟!,, يالله لا تجزّعني
الغالي اللي شملنا بالوفا نفعه
مادري وش اقول والاخبار تفجعني
ابكيه والدمعه من القلب منتزعه
وبالنفس واجد يالولا الدين يمنعني
خالي وفرقاه ما من بعدها رجعه
ليه قبل ما يودع جا يودعني
راح وترك اسم وصيت وسيره وسمعه
وعيال لانادت - بصوت الفخر - تعني
طبع الكرم كان طبعه ياحلو طبعه
والجود والمرجله لا صار هو المعني
وان جيت للدين شرع الحق هو شرعه
دعواه يارب باهل الفضل تجمعني
يا طيب قلبه ياطيبه راعي الفزعه
يبيع عمره ولو ما قلت له بعني
شيخ والى قام قام المجد مع ربعه
يقول ما ينفع الاحباب ينفعني
ارثيه وارثيه والامال منقطعه
يا كثر الاحزان من بعده تنازعني
يا لله عسى بجنة الفردوس له رفعه
يارب يا سامع الدعوات تسمعني
|
|
لا والله اللي راح منا فقيده
تفجعت منه القلوب المواليف
ما حط في البنك السعودي رصيده
ينفذ حصيل يديه للجار والضيف
شوفت ضيوف الليل ريفه وعيده
وطلعه على القارح بعيد الاطاريف
الدين كامل والخصايل حميده
لو كانت القرنه دهر كنها ريف
لو البكاء المفجوع مثلي يفيده
بكيت لو قال اكثر الناس ياحيف
مرحوم ياذاك الشجاع الوليده
صيحة طلق وصلت من السيف للسيف
الموت سنه والعوض بالشريده
جعل الثلاثة مثل ابوهم على الكيف
اهدافهم عن كل زله بعيده
ويطوعون اللي براسه زعانيف
وان جو على جمس تقادح حديده
يمكن يزوع الماء الاديتر من الحيف
ان واجهوا منصور وإلا عضيده
سعد هو اللي بانتظار المناكيف
يوم اجتمعنا العام عند الوعيده
لولا سعد ضاقت علينا المحاريف
وبندر عسى بندر حياته سعيده
ألين من الديباج واقطع من السيف
ادعيلهم في كل شمس جديده
بالعز والتوفيق في كل توصيف
|
|
لو البكى ياعم يحييك وايفيد
لا ابكيك أنا ياعم صبح او عشيه
مرحوم يلي غبت في ليلة العيد
والعيد عندك برمضان اوضحيه
عمي أبو زايد به الطيب وايزيد
دمعة إلى حيته ايسابق اشفيه
لا غبت عنه ايام جتله مناشيد
يعدّها المرحوم عام او خطيه
قبل انتوجه لم بيته ضحى العيد
قرايب او جيران عنده سويه
سمعت هاتف قلت عمي ابتأكيد
ذي عادته لا ابطيت يزهم عليه
لاشك جاني علم هم او تنكيد
قالوا رحل عمك او نفسه رضيه
في تاسع الحجة او خلقك مشاهيد
يا الله تقبل نفس جتلك زكيه
مشيت مدري وين رايح ابتحديد
وذكرت انا ما قال رب البرية
يا موت يامفرق جماعات واتبيد
سيف ابها الدنيا ابيمنى جريه
لاشك من يرسلك نحمده وانزيد
حق او نهاية درب لنفوس حيه
جنيا على اسمه شاقي بهى مقاريد
اللي شقى غلطان ما راح نيه
الموت حدد له من الرب تحديد
محد امخلد قافيته المنيه
يا قبر يا حظك ابرمز الاجاويد
خير من الرحمن جاك او هديه
لو البكى ياعم يحييك وايفيد
لا ابكيك انا ياعم صبح او عشيه
لاشك ذا درب مشى عنه منحيد
رسول الامه ما شي به نبيه
ياحظ من مثلك قضوها مزاهيد
ومن مثلكم به عاش لا واهنيه
بالدين ثم الطيب والبرو الصيد
قضيتها يا عم روحه اوجيه
في مجلسك يا ما اجتمعنا تراديد
اضيوف مع جيران ربع او دنيه
ويا ما اجتمع عندك اخيار الاواليد
في مجلس مفتوح ناره لضيه
يامن مسحت احزان من جاك بالايد
ويمناك عن يسراك تكمى العطيه
ليتك تشوف الناس جمع او مفاريد
خلفك مشوا محد ايناظر خويه
كل طلب لك رحمة الرب وايشيد
من شبتك ما سرت بدروب غيه
زايد أو عبدالله لكم قلت واعيد
عمي رحل وانتم تراله بقيه
سيروا على دربه كما سار وايريد
دين او طيب او خير وصل او حميه
نصايحه بالدين والطيب واتفيد
يا اعيال عمي نفذوها وصيه
وصلوا عدد طفل لهج واشبعه ديد
على الذي ينزار غربي طميه
|
 |
|
