|
|
|
ياهاجسي بدد حروفٍ قوية
قبل الفكر يفقد مدارك صوابه
خل الشعر يذكر من الشي شيه
والصدق طبعٍ للنقي في الكتابه
اليوم يومٍ جاء لرد العطية
صوب العطا السّابق ولابه زرابه
ياهم لال الحزن والمدمعيه
وصبرٍعسيرٍ لفنا في جرابه
آمنت باللي كافلٍ هالبريه
مانيب أعارض ما انكتب في كتابه
وفي جبهة ابن آدم بيان وهويه
مكتوب فيها ما حضَر له وغابه
بدنيا رخيصه ماعليها بقيه
والموت كلٍ طارقٍ يوم بابه
بسّ المصيبه بعض الأحيان كيه
لامن فقد غالي ولاينشرى به
يالايمي بالدمع مالك وليه
ماظن في دمعي عليها معابه
وترى الملا في الموت ماهم سويهّ
وبين الردى والطيب مابه تشابه
أحدٍ يموت بموت يفجع دويه
وأحدٍ يموت بصمت مايندرى به
والحرّ لامن مات حزَّن خويّه
والبوم لامن مات خيَّس خرابه
)وسبيكه( أمٍ ما ولدتي,, زكيةّ
والطيب يحدث بين ناسه قرابه
لا والّذي جاورها ماهي رديه
حرمه لها فيني جلال ومهابه
عاشت على طبع النقا والحميه
وماتت وكفنها الوفا من ثيابه
كانت تعاملني مثل والديه
في جوعي وبردي وفقري ونابه
وكانت لي من وهج المقاييل فيه
وحصن حصينٍ للذرا ينتخا به
واليوم زل بها القدر والمنيه
وغابت وغيبها اللحد في غيابه
ياليت في رد القدر مقدريه
لاعطيها من هالعمر ما احسب حسابه
زالت ,, ولا زالت في هالرّوح حيه
مثل العطش يغري ظماي بسرابه
يالله تحشرها بجانب سميه
وتارد على الكوثر وتشرب شَرابه
من دار شايبها خذوها خفيه
وكبده تقطع بالحزن والكرابه
وصلوا عليها حزة المغربية
وأقفوا بها للمنتهي والغرابه
وسدوا عليها في اللحد بالطويه
وترابها يكثر ويعلا نصابه
وأقفوا وهم يدعون بالمرحميه
الله يثبت قلبها في جوابه
ويلهم أهلها بالصبر والسليه
ويبطي بيوم اللي بقى في القرابه
ويجبر عزى أقواهم بلاً بالبليه
ويحسن لأبو محمد,, يخفف مصابه
يا )شايب الرحمن( جتك الحنيّه
وكني بصوتك له ونين الربابه
وتذكر وليفك في العصور البليه
وجنح بك التَّاريخ لأقصى شبابه
بذيك الليالي والسنين المضيه
جمعكم الله بالسعد والحبابه
للحَرق دنياً لاقبلت لك بنَيه
وإن أدبرت همٍ تناشَب نشِابه
واهم وحالم من نواها بنيِه
والفالح اللي جاعل الله زهابه
ولو السَّعادة لاغدت في البغيه
تمطرنا غيثٍ مثل غيث السحابه
ماعشنا بين الرفض والقابليه
وصرنا برهن الوقت لين وصلابه
ونركض ورى المجهول روحه وجيه
ونفجع بهول الغيب لأسدَل حجابه
ولو كل عينٍ في كراها هنيه
مابين السهر )الوفي( وانتحابه
ولولا الحزن يعطي الفرح جاذبيه
ماذيق طعمٍ للفرح والطرابه
ولولا البخل مامدح ناس أجوديه
ولولا العدو ماصر مصحب وصحابه
وهذا أنت لولا اللي طواها بطيه
ما بان في قلبك غلاً واشتقا به
والضد يحلا لا حضَر في ضديه
وكانه تبدل فالصبرَّ يعتزى به
والصَّبر ما يضيع حليّه
وماخلق ضيق إلا انخلق له رَحابه
واصبر على الدنيا تراها دنيه
وإيمانك أقوى من حشود الكآبه
أقوله وإن كنت أنا أصفق بديه
الموت حق وكلّ حي يهابه
والموت مجعولٍ حصان ومطيّه
والكلّ راكبها رضاً أو غصابه
وتراه مامورٍ والآمر وليه
ودربٍ يبي يمشي,, لمن ما مشى به
وياعل قبرٍ ضم ذيك النقيه
تمطر مجاهيم الحَيا في ترابه
ويخضَرّ ما حوله ويقطر نديّه
والعطر من فوح النّفَل ينقرا به
أختم حروفٍ قلتها في العشيّه
في ساعةٍ حزني مركّب سحابه
وصلاة ربّي عدّ نجمٍ وضيّه
وإعداد ما سارٍ بليلٍ سرى به
وإعدد ماليلك تمادى بغيّه
وإعداد ماحزنك تزايد عذابه
وإعداد ماطيرٍ تعلاَّ بغديّه
وإعداد رزّق طار خلفه وجابه
وإعداد مانساق الفجر لضحويه
على نبيٍ للهدى يحتذى به
|
|
أدعوك يامنشي مزونا ثقيله
بين السماء والارض تسوقهن سوق
وبسماك ياراع الصفاة الجليله
ياللي على عرشك تعليت من فوق
تقبل دعاء من بك توسل وسيله
تغفر لعودا ياوليه من العوق
يالله حطه في جنانا ظليله
ويارب تجعله مع الحور منطوق
والذنب ياربي بعفوك تزيله
لك رحمتا عمة على كل مخلوق
دعوت ولد لوالده يرتجيله
ياللي بعفوك سابقا مانت مسبوق
ابوي راح يسهل الله سبيله
لو كنت انا مشتاقله غايت الشوق
في قدرة المأذون مافيه حيله
واثره صحيح ان كل مطرود ملحوق
لو امدحه وأغليه مابها فشيله
فيه الحياء والدين ماقيل مطفوق
ويوم الفعل الماضيه دور جيله
يلحق خويه تشهد الجرد والنوق
والجار عنده يأمنه بالحليله
محدا حكا به قال به غدر او بوق
ابا اختصر خصايله مانطيله
قل الكلام يخلي الهرج له ذوق
وصلاة ربي عد نبت لمسيله
على النبي وعداد حرفا بطاروق
|
 |
|
