انا بنشدك عن فرعاً فحلها مالها مساس
تجيب الصيف قبل الفحل منها يقضي الشاني
ولودٍ كل عام,, تالد الاخماس والاسداس
طروب دايم ترقص مع العاصوف طرباني
وإليكم الحلول الصحيحة,,
إعداد ماقالو هل الطيب لاباس
حي التراث أو لغز عبره لفاني
ذاك (النخل) معروف فضله على الناس
وقت الرخى وإن جار فيهم زماني
من تمرها ياما دحو, جص, وأكياس
ماقصرت في وقت شح أو سواني
فهد بن عقيل الطويان,, بريدة
وكالات الفضا ناسا تجيب العلم من تكساس
تبث الصوت والصورة إلى اقصى العالم الثاني
خفيفة دم بنت الناس عليهاقرنس القرناس
قوي الباس ساس وراس بكل احساس سلطاني
طروبٍ للفخر ترقص بلا طار ولا مرواس
ضفايرها عرا جيد النخيل بلونه القاني
على هام السحاب اللي نثر وبله بدون اقياس
اقول اللغز ياهل العرف هز الشوق واشجاني
تحية لابن صقري عدما هب الهوا النسناس
وتحية مثلها مني هدية لابن بدراني
خلف الأسيد الشراري
هلا بشاعر بنظم القوافي رقيق احساس
يروض صعيب القاف مع ضبط ال الاوزاني
ترى اللغز واضح مايتعب كثير الناس
ولو أن ضعيف العقل لوشاف عمياني
ترى لايغرك كبر زوله وزين لباس
إلى جا نهار الجد والعلم لك باني
وأنا أقول هاذي نخلةٍ تعجب الغراس
يشيل الجريد عذوق والجذع رياني
مشاري خالد الدعجاني شقراء
على تراث الجزيرة شوفو الياقوت والاالماس
والاحجار الكريمة نصفها لولو ومرجاني
تولاها رجال مخلصين والزمن حساس
ظهر مجهودهم واخلاصهم واضح للاعياني
هلا يامرحبا فاللي يقيسون العلوم اقياس
هلا حيا الله اللي ينظمون اللغز ملياني
نشد عبدالله الصقري عن النخله عريب الساس
ماغير السكري والبرحي الاصفر وروثاني
محمد عبدالكريم الغربي الزلفي
هلا بالصفحة اللي في تراث بلادنا نبراس
هلا باللي يحررها هلا من قلب ولساني
هلا بالشاعر اللي يوم غنى دقبه هوجاس
بناقافه على معنى وجر الصوت طرباني
ترى المعنى على النخلة ويدريبه جميع الناس
حريب الجوع محصول النخل في غبر الأزماني
صويلح بن عبيسان الشيباني
ليا منك نشدت عن الغضيه جالها جساس
هاذيك النخله اللي عند اهلها تسوى الاثماني
عسى الله يسقي النخله لياغرست بجنب الساس
وطاها ساقي المويه ويلقط تمرها الجاني
سلمان عزيز الحافي
هذاه اللغز مايدخل على العراف بالهوجاس
سقا الله وقتها النخله واقول العلم نيشاني
واحله من هجوس تنتج الياقوت والألماس
هي النخله هذا حلي وهذا اسمي وعنواني
أمل عبدالرحمن القصيم / عنيزه
نبا نخبرك يالصقري مدام انك نشدت الناس
عن اللي تمرها واثمارها في كل الاوطاني
هذيك النخلة الخضراء نحط انتاجها بكياس
طعام الجائع الضامي بماضي ذيك الأزماني
عطا الله جمالاً للطبيعة وكل لها غراس
تشوف الطير فوق غصونها يمرح والهاني
شامان هديبان الرشيدي حائل / قرية الدهيماء
أ خذت الصاحب الطايع ليا سيّر على قرطاس
وراعي الحق سلطاني,, وقلبي ترجم الساني
النخله,, هي حله بدون اتعب الهوجاس
مثل ماقيل بالماضي,, صحيح العلم نيشاني
ريناد سلمان عزيز الحافي ساجر,, أم رغل
بديت باسم الله مع كل احساس
بجاوب اللغز المنقح وجاني
اللغز لينه دوك حله مع الناس
واهني الصقري مع كل عاني
يامحلا تمره مع الصبح وادماس
بقدمه للضيف واللي نصاني
فهد محمد القصير/ الأسياح / حنيظل
أهلاً هلاً باللي عرض لغز للناس
اللي بيوته جيده بالمعاني
اللغز واضح مايبي فكر واحساس
كل يعرفه من بعيد وداني
فرعه جميلٍ مالها جنس واجناس
تمر النخل هو قوتنا من زماني
علي محمد القصير / الأسياح
ياكاتبين اللغز لمشاكس الناس
لغزك بسيط واضح بالمعاني
نخلةٍ بالصحراء كما يالبحر ماس
ياما عليها اعتمدنا باكلنا والمباني
مع طلعها فنجال يقعد الراس
هي مرفدي لو زماني زواني
ناصر صالح الفراج/ الأسياح
عبر التراث أرسل سلامي ألمع من الماس
واحلى من شرب الما للذي كان ضمياني
الصقري أبدع بالمثايل وجابها بشعره الحساس
والذيب مايقدر على رقي النخل لوكان جيعاني
النخلة الفرعا وسط المزارع شامخه بالراس
أشوف الثمر في راسها من كل الالواني
تركي معوض القثامي/ الرياض
هلابك مرحبا وعداد ماهو ذعذع النسناس
اهليبك تراحيب عدد مايصدح آذاني
تراء النخله لها قيمة مع أهل الكار والنوماس
تراها أصناف واشكال تعدد عدة الواني
عبدالله عبدالعزيز الفهد الرياض
أهلاً هلابك عد ماهز الورق نسناس
واعداد مايثمر من الأشجار باغصاني
ياشاعرٍ زين المعاني صاغها باحساس
هندس قواعد ساسها واصبح لها باني
أرسل لنا لغزٍ بقيمته ألماس
واشغلت انا فكري لين بحلها جاني
قصدها نخلةٍ تعطي رطبها بدون قياس
ذكرها ربنا الرحمن معلي لقدرها شاني
محمد عبدالله الحنيني القصيم / البكيرية
ألا يامرحبا ترحيبة مني بدون قياس
على الصقري مع رفاقه وحل اللغز لي باني
ترى هذي هي النخلة الايازينها ياناس
الا يازينها وعذوقها في كل بستاني
الشاعر: محمد بن عبدالعزيز الخنيفر
لقينا الحل حل اللغز يالصقري عداك الباس
دررها مثل درّ لابسه مدعوج الاعياني
تراها النخلة أم التاج الأخضر والجذع والراس
ثمرها فالجزيره ياكله حضرٍ وبدواني
ولكن اهملت واستبدلت كاكاو في قرطاس
مع الدله يقدم لك حلاو اشكال والواني
عبدالرحمن بن سعود اليوسف أشيقر
الا ياقلب ريحني كفايه زايد الهوجاس
ترا فصل الصيف يزود همومي والاحزاني
والاليته على وقتنا مضى وقرب المحماس
وعلاج ضيقتي ماهو على ماقيل بلشاني
وفكرنا بالغزا بالجزيرة هادف احساس
لقيت الحل نخله عزيزه عندنا في كل الأزماني
وسلام عد ماهب الهواء النسناس
سلام صادق قلته ولا لى مقصد ثاني
محمد البوجان الشراري الحديثة
سلامي ياصل الصقري ومطبوعاً على قرطاس
ولغزك واضحٍ عندي ولاني فيه حيراني
وترى الفدعا هي النخلة وهبها الله لبعض الناس
الا يازين تمر تعماو وتنعش منهو جيعاني
إبراهيم محمد عبدالله آل مزيد الرياض
الغرس واجد أشكال وأجناس
والصقري لغزه أبين من سهيل اليماني
وياما حلى ظل النخل لاذعذع النسناس
واللغز شعار الوطن من قديم الزماني
عبدالمحسن بن محمد المحيسن رياض الخبراء
بديت باسم اللي خلق كل الأجناس
أطلبك ياربي على الحق تقداني
اللغز واضح ياهل العرف والاحساس
النخلة اللي لها تاريخ في كل الأزماني
ورد ذكرها بالقرآن خلقها خالق الناس
هذا جواب الصدق ماني بلغطاني
هويدي معزي العواجي القريات/الحديثة
هي السؤال وهي من ينشد الناس
عبدالله بن سعود قوله لفاني
عبر الجزيرة اقوله يرفع الراس
حله نخيل ذكرها الله بالجناني
بدر صالح الفرج /الزلفي/الجوي
على صفحة تراث اللي يحررها عريب الساس
وتقرأها رجالٍ تكرم الضيفان والعاني
ابا اشارك بحل اللغز ياهل العرف والنوماس
من الطائف عن تسقيه دائم غرالامزاني
ترا (النخلة) ذكرها الله بكتابه غذاء للناس
وهي زاد النشامى من قديم بذيك الازماني
موسم بن سفر القثامي الطائف
أهلاً بهلابك عد ماهز الورق نسناس
واعداد مايثمر من الأشجار بأغصاني
ياشاعرٍ زين المعاني صاغها باحساس
هندس قواعد ساسها واصبح لها باني
أرسل لنا لغزٍ فاق بقيمته ألماس
واشغلت انا فكري لين بحلها جاني
وقصدها نخلةٍ تعطي رطبها بدون قياس
ذكرها ربنا الرحمن معلي لقدرها شاني
محمد عبدالله القصيم / البكيرية
حل لغزك يالصقري نخلة مالها أجناس
يظهر ثمرها كل عام ولها اشكال وألواني
لها بقلوبنا يالمسلمين جذور ولها ساس
وتحبها من محبة نبينا وجداني
محمد جايز بن شويمي القصيم/بريدة
سلام من الشاعر مرهق الاحساس
عد النجوم وعدهتاف الأمزاني
ولغزك عرفته ويشارك باقوي الباس
لجلك حكمته من غير زود ونقصاني
هذيك النخلة اللي يشتاق لها جميع الناس
جعله الله كرامه لنا على مرا الأزماني
بندر بن غازي بن مريخان
هلا يامرحباً باللي, ابيوته كنها نبراس
ابيوت الشعر يسكبها ويحبكها وسلطاني
هلا في منعش الخاطر, هلا في مبعد الهوجاس
هلا فالطيب الباني هلا في صاحب الشاني
اوهاك الحل يالصقري فداك التبع والأنجاس
ترى النخلة ذكرها الله ابسورة قاف تبياني
عبدالله بن غازي عيد الحنيني /القصيم
وفكرنا بلغزٍ بالجزيرة مايب حساس
ولقيت الحل نخلة غاليه في كل الاوطاني
غلاها ياجماعة في وطنا ماله المقياس
غلاها بعمرنا الحاضر وسابق مر الأزماني
الا يازين بالجلسة تحتها والهواء نسناس
بفصل الصيف كان سهيل بان ولاح للاعياني
محمد عايد الموجان الشراري الحديثة
يلي بعثت اللغز بحبرٍ وبقرطاس
نعطيك حله مايحمل ثواني
النخلة اللي طلعها ماله اقياس
نقدم ثمرها للنشامى بصياني
فريح بن صالح الشملاني العنزي الرياض
على مبنى الجزيرة علقوا درع الوفاء والكاس
على مجهودهم يستاهلونه خطل الايماني
عسى ربي يوفقهم لدرب الخير والنوماس
لهم منا جزيل الشكر تقديرٍ وعرفاني
لقيت البنت ياعبدالله الصقري من الاغراس
تشوفون النخل بالوشم فيه اشكال وألواني
الزلفي الزلفاوي
بديت بسم الله مكون الانفاس
هو الذي يشفى مرضٍ كل مرضاني
عن بعد ذكره خط القلم في ابيض القرطاس
في حل لغز واضح شوف الاعيان
اللغز حله سحابة برقها كأنه المقباس
حلو مطرها تالي الليل والداني
الى رعدها تالي الليل يوقد النعاس
وتزوى الرعايا وكل من جاه عطشاني
منور راجي المرتعد العنزي الجوف/مطار الجوف
يللي بعثت اللغز لغزك على الرائس
أعطيك حله كان ربي قداني
النخلة الي في بساتين غراس
امنولن تنزف عليها السواني
واليوم جاء دور المكاين وغطاس
البر وخطت بالمفالي مباني
دخيل فضي الشملاني العنزي الرياض
عسا ربي يديم الباسقات ومن لها غراس
لها طلع نضيد سكري برحي ومكاني
جواب اللغز نخلة وانتظر يطبع على القرطاس
يجيك الحل في غرة ربيع أبيومه الثاني
مصلح محمد المطيري الرياض
قريت اللغز في صفحة تراث كنها الألماس
وعرفت الحل وارسلته وضمنت عنواني
ترى حله هي النخلة وكم قالها قرناس
وتحياتي لكم تقدير وزاد الود باشجاني
خالد الراجح القصيم /البكيرية
حي بيوت لغز ركز عمدها على ساس
لغزك عرفته أول ماله اليوم ثاني
هذا النخل وخوصه للنار مقباس
حلو ثمرها يحبك أشكال وألواني
إبراهيم الصالح أبا الخيل/عنيزة
