|
|
|
قال الوداع وقلت له بالسلامة
هذي ظروفي دايم جابراتي
مسحت عبراتي بكف الندامة
وتليت من كفه حوايف عباتي
قفى يداري عضة في ابهامه
وقفيت اداري عضة في شفاتي
وكل رحل يحمل بقايا غرامه
وراحت حياته يوم راحت حياتي
|
|
ياكثر شعر كتبته امس والبارح
وياكثر شعرت عقب فرقاه سجلته
دفاتري امتلت من سبة الجارح
هذا,,وغير الذي للحين ما قلته
خلى دموعي تهل وخاطري سارح
ياكثرهم عليه اليوم شايلته
|
|
اليوم يخلف عن مماشيه ممشاي
والله ما اضمن من عذابه نجاته
لو اتعلق فيه ماينفع بكاي
خلاص فات الوقت واعلن فواته
اليوم بعطيه العزا عقب فرقاي
عندي خبر وش قيمتي في حياته
وانا العزا مابيه من كبر بلواي
ماينفع اللي عاش واعلن وفاته
|
|
مدري رجاء مدري وفاء مدري احساس
انطرك وادري قلت لي ما انت راجع
يامن سوت عينه مخاليق واجناس
ادخل على الله لاتزيد المواجع
جفني خذاه بتالي الليل هوجاس
وادري بجفنك تالي الليل هاجع
ابا تحرى جيتك واقطع الياس
واقول نور الحق لابد ساطع
ماهمني مكسب ولاهزني افلاس
بمشي على عمياي واقول راجع
|
|
جاني بلاي وضيقة العام جتني
تلم بي لم الهوا بالبيارق
لامنها وقت المغيب احضرتني
يسيل دمعي فوق الاوجان حارق
الضيقة التي في حناي ادمرتني
بلاي من هم بالاضلاع غارق
باسباب من مدة غيابه طوتني
عامين لاعلم ولا منه طارق
جفت حياتي والهموم امحلتني
ولاشوف به غيث ولاشوف بارق
من وين ماطقيتها عاكستني
ياكثر مابيني وبينه فوارق
|
|
من يوم مالوحت لي كف يمناك
لليوم دمعي بالخفا ماحبسته
ومن يوم ماذوقتني حر فرقاك
والياس زرعه في حياتي غرسته
شريت لي ثوب على شان لقياك
والثوب راحت موضته مالبسته
وشريت عطر مازهاني بلياك
اربع سنين بعلبته مالمسته
|
|
ميخالف ارحل بس لاترحل بعيد
ميخالف اهجر بس خلك بداري
ميخالف اعشق الف عذرا من الغيد
ميخالف اجرح بس حاول تداوي
اناعقب فرقاك مامرني عيد
العام ذا من كل الاعياد عاري
ياصاحبي لاتكثر العذل وتزيد
معذور الاعمى لومشى الليل ساري
بابيع عمري لك من غير تحديد
عمر رخص من يوم شفت انكساري
عقبك قسم بالله مدري وش اريد
ابنتظر مابي ثمن لانتظاري
واتركني اغرق في بحور التقاليد
ارحل وسافر بس خلك بداري
|
|
جيته ابستأنف مواعيد فرقاي
أبي الوداعية تاخر نهارين
جيته وانا مسبوهة الفكر والراي
بجاهة الرحمن بعدين بعدين
يسراي راحت تلتجي وسط مخباي
مابيه يلحظ رعشة بي من البين
ويمناي تمسح دمعة في محياي
وكلتها تستر دموع من العين
وبين التنهد والحيا موت رجواي
ابي الكلام وعز وامالي الشين
|
 |
|
