كريم يا برقٍ على ساجر يلوح

عساه يسقي تختخه من رغدها

المزنة اللي بان لبروقها ضوح

من برقها ,, كنك تسمّع,, رعدها

عسى الحيا منها على البيد مطروح

يالله عساها!! دعوة أم,!! لولدها

لي في الحياه: آمال,, واحلام,, وطموح

ابني لها,, وانسج لها,, وانتقدها

دام الهوى: له باب للكل مفتوح

النفس,, لا زالت تواصل جهدها

ياللي جرحتي روح وتقول بمزوح

داو ,, الجروح اللي تعاني نكدها

مجروح !! واعلنها من اليوم مجروح!!،

والله,, يلعن من جروحه جحدها

ياكثرها فالقلب طعنات وجروح

عديتها وازريت,, لا احصي عددها

الغلطة اللي سجلة لي على اللوح

تاخذ جزاها كان قلبك فقدها

انت السبب فيها ولا انته بمسموح

فالاوله,, والغلطة اللي بعدها

غلطة ولا,, (ف) جروح الاحباب مصلوح

الا,, التعب لعلاجها آمر وأدها

يا للي جرحتي روح وانتي غلا روح

اخذي بقايا روح واخذي جسدها

حرام غيرك لو يجي كل مملوح

ما تلمس اجملهن جروحي بيدها

خذها شهادة حق: يا نايح الدوح

شلها وهي في ذمة اللي شهدها

بوح الجروح: ان كان ما يعتبر بوح

سر الهوى في بير حبك,, وردها

خل الهجوس: تسج!! وثلج!! وتفوح

وسط الصدور اللي كواها جلدها

الى متى صوتك عن السمع مبحوح

متى اعزف انغام الطرب في وعدها

لون العقال ليا اختلف يقصر الشوح

يا لله عسى نفسي يذعذع سعدها

لين البروق اللي على ساجر تلوح

على عروش الزين ينزل بردها