وش ينبغي بالبيت من بعد راعيه

اظلم وموحش عقب عين النداوي

حر الحرار اللي على كف داعيه

طيرٍ على جول الحباري هقاوي

لو طالت الأيام مانيب ناسيه

ولو هو بعيد الدار قلبي رجاوي

حبي له اكثر من دنايا عوانيه

حتى غلا أمه عند حبي مساوي

ربيع قلبي كل ما حل طاريه

انا مريض القلب وهو المداوي

يا ناس احبه يا ملا ليه ما غليه

هو نور عيني ما تفيد الحكاوي

قلتوا كثير وزايد الهرج ما بيه

قلبي على شوفه شفوقٍ شفاوي

لعل عينٍ ما بكت فقد غاليه

تعطي العمى ما فاد فيها مداوي

وين البشير بجية الزين واعطيه

روحي بشاره مع جزيل العطاوي